Self Financed Schools Online Services: महाराष्ट्रातील स्वयंअर्थसहायित शाळा आणि शैक्षणिक संस्थांसाठी शालेय शिक्षण विभागाने महत्त्वाची सुविधा उपलब्ध करून दिली आहे. या शाळांशी संबंधित विविध शासकीय सेवा आता ऑनलाइन पद्धतीने उपलब्ध करून देण्यासाठी नवीन ‘एसएफएस’ (Self Financed Schools – SFS) पोर्टल सुरू करण्यात आले आहे. शालेय शिक्षण मंत्री दादाजी भुसे यांच्या हस्ते या पोर्टलचे ऑनलाइन उद्घाटन करण्यात आले. या पोर्टलवर स्वयंअर्थसहायित शाळांसाठी एकूण १० प्रकारच्या सेवा उपलब्ध करून देण्यात आल्या आहेत. या लेखात त्या 10 ऑनलाईन सेवांची लिस्ट व पोर्टल लिंक दिली आहे.
नवीन SFS पोर्टलमुळे शाळांना विविध परवानग्या आणि ना-हरकत प्रमाणपत्रांसाठी ऑनलाइन अर्ज करता येणार आहेत. यासाठी आवश्यक कागदपत्रे पोर्टलवर अपलोड करण्याची तसेच सादर केलेल्या अर्जाच्या प्रक्रियेचा मागोवा घेण्याची सुविधाही उपलब्ध होणार आहे. त्यामुळे यापुढे संबंधित शासकीय सेवांसाठी अर्ज करण्याची प्रक्रिया अधिक सुलभ आणि पारदर्शक होण्यास मदत होणार आहे.
SFS पोर्टलवर स्वयंअर्थसहायित शाळांसाठी कोणत्या 10 सेवा उपलब्ध?
नवीन पोर्टलवर स्वयंअर्थसहायित शाळा आणि शैक्षणिक संस्थांसाठी खालील १० सेवांचा समावेश करण्यात आला आहे.
1. मंडळ संलग्नतेसाठी ना-हरकत प्रमाणपत्र (NOC): शाळेला संबंधित मंडळाची संलग्नता मिळविण्यासाठी आवश्यक ना-हरकत प्रमाणपत्रासाठी ऑनलाइन अर्ज करता येणार आहे.
2. ना-हरकत प्रमाणपत्राचे नूतनीकरण: यापूर्वी मिळालेल्या ना-हरकत प्रमाणपत्राचे नूतनीकरण करण्यासाठी अर्ज करता येणार आहे.
3. दोन सत्रांतील शाळेसाठी ना-हरकत प्रमाणपत्र: शाळा दोन सत्रांमध्ये चालविण्यासाठी आवश्यक ना-हरकत प्रमाणपत्र मिळविण्याची सुविधा उपलब्ध करण्यात आली आहे.
4. शाळेचे स्थलांतर: स्वयंअर्थसहायित शाळेचे एका ठिकाणाहून दुसऱ्या ठिकाणी स्थलांतर करण्यासाठी ऑनलाइन अर्ज करता येणार आहे.
5. शाळा व्यवस्थापनाचे हस्तांतरण: शाळेच्या व्यवस्थापनाचे हस्तांतरण करण्यासंदर्भातील प्रक्रिया या पोर्टलद्वारे करता येणार आहे.
6. इयत्ता अकरावीसाठी अतिरिक्त तुकडी सुरू करण्याची परवानगी: शाळेत इयत्ता अकरावीसाठी अतिरिक्त तुकडी सुरू करण्यासाठी आवश्यक परवानगी मिळविण्याची सेवा उपलब्ध आहे.
7. अतिरिक्त शाखा सुरू करण्याची परवानगी: इयत्ता अकरावीमध्ये अतिरिक्त शाखा सुरू करण्यासाठी ऑनलाइन अर्ज करता येणार आहे.
8. मंडळ, शाळेचे नाव व माध्यम बदलण्याची परवानगी: शाळेचे मंडळ बदलणे तसेच शाळेचे नाव किंवा शिक्षणाचे माध्यम बदलण्यासाठी आवश्यक परवानगी घेण्याची सुविधा उपलब्ध आहे.
9. ना-हरकत प्रमाणपत्र संलग्नता रद्द करणे: शाळेच्या ना-हरकत प्रमाणपत्राची संलग्नता रद्द करण्यासंदर्भातील अर्ज करता येणार आहे.
10. शाळेची प्रवेशक्षमता वाढविणे: शाळेची विद्यार्थी प्रवेशक्षमता वाढविण्यासाठी ऑनलाइन अर्ज करण्याची सुविधा उपलब्ध करून देण्यात आली आहे.
SFS पोर्टलमुळे शाळांना काय फायदा होणार?
पूर्वी विविध शासकीय सेवांसाठी अर्ज सादर करणे आणि त्यासंबंधीची कागदपत्रे जमा करणे यासाठी शाळांना प्रशासकीय प्रक्रियेतून जावे लागत होते. आता नवीन SFS पोर्टलमुळे अर्ज सादर करणे, आवश्यक कागदपत्रे अपलोड करणे आणि अर्जाची सद्यस्थिती तपासणे ही प्रक्रिया ऑनलाइन करता येणार आहे.
यामुळे शाळांच्या प्रशासकीय कामकाजात सुलभता येण्याबरोबरच अर्ज प्रक्रियेत पारदर्शकता निर्माण होण्यास मदत होईल. शालेय शिक्षण विभागाने विकसित केलेल्या या पोर्टलमुळे स्वयंअर्थसहायित शाळांशी संबंधित विविध सेवांसाठी डिजिटल पद्धतीने अर्ज करण्याचा मार्ग उपलब्ध झाला आहे.
शालेय गुणवत्तावाढीसाठीही प्रयत्न करण्याचे आवाहन
SFS पोर्टलच्या उद्घाटनप्रसंगी शालेय शिक्षण मंत्री दादाजी भुसे यांनी शालेय शिक्षण विभागामार्फत राबविण्यात येणाऱ्या विविध उपक्रम आणि अभियानांची प्रभावी अंमलबजावणी करण्याचे आवाहन केले. शालेय गुणवत्तावाढीसाठी सर्व संबंधित अधिकाऱ्यांनी आवश्यक प्रयत्न करावेत, असेही त्यांनी सांगितले.
या कार्यक्रमाला शिक्षण आयुक्त सचिंद्र प्रताप सिंह यांच्यासह शिक्षण विभागातील संचालक, विभागीय शिक्षण उपसंचालक, शिक्षणाधिकारी, गटशिक्षणाधिकारी आणि केंद्रप्रमुख ऑनलाइन उपस्थित होते.
अशा प्रकारे स्वयंअर्थसहायित शाळांसाठी उपलब्ध करून देण्यात आलेल्या नवीन SFS पोर्टलमुळे विविध शासकीय सेवांसाठी अर्ज करण्याची प्रक्रिया ऑनलाइन आणि अधिक पारदर्शक होणार आहे.
Self Financed Schools Online Services SFS Portal Maharashtra
- Self Financed Schools SFS Portal Maharashtra : https://mahasfs.org/
- शालेय शिक्षण विभाग महाराष्ट्र अधिकृत पोर्टल : https://education.maharashtra.gov.in/
