Senior Selection Pay Scale Training 2026 : राज्यातील शिक्षकांसाठी वरिष्ठ वेतनश्रेणी व निवड वेतनश्रेणी प्रशिक्षण २०२६ चे आयोजन करण्यात आले आहे. राज्य शैक्षणिक संशोधन व प्रशिक्षण परिषद, महाराष्ट्र, पुणे यांच्यामार्फत हे प्रशिक्षण दि. १३ नोव्हेंबर २०२६ ते २२ नोव्हेंबर २०२६ या कालावधीत राज्यातील सर्व जिल्ह्यांमध्ये एकाच वेळी आयोजित करण्यात येणार आहे. वरिष्ठ व निवड वेतनश्रेणी प्रशिक्षणार्थी शिक्षकांसाठी 9 महत्त्वपूर्ण सूचना जारी करण्यात आल्या आहेत. सविस्तर पाहूया.
वरिष्ठ व निवड वेतनश्रेणी प्रशिक्षण २०२६ संदर्भात प्रशासनाकडून प्रशिक्षणार्थी शिक्षकांसाठी महत्वाच्या सूचना देण्यात आल्या आहेत. यामध्ये प्रशिक्षणाचे वेळापत्रक, उपस्थिती नोंदविण्याची पद्धत, पूर्वचाचणी व उत्तरचाचणी, आवश्यक साहित्य तसेच प्रशिक्षणानंतर पूर्ण करावयाचे स्वाध्याय आणि प्रकल्प अहवाल यांचा समावेश आहे. सविस्तर पाहूया.
वरिष्ठ व निवड वेतनश्रेणी प्रशिक्षणार्थी शिक्षकांसाठी 9 महत्त्वपूर्ण सूचना
वरिष्ठ व निवड वेतनश्रेणी प्रशिक्षण २०२६ संदर्भात प्रशासनाकडून प्रशिक्षणार्थी शिक्षकांसाठी दिलेल्या सूचना खालीलप्रमाणे आहे.
१) प्रशिक्षणाची वेळ व उपस्थिती : प्रशिक्षण १३ ते २२ नोव्हेंबर २०२६ या कालावधीत दररोज सकाळी ९.१५ ते सायंकाळी ५.३० या वेळेत होणार आहे. पहिल्या दिवशी सकाळी ९ वाजता उपस्थित राहणे आवश्यक आहे. प्रशिक्षणाच्या प्रत्येक तासिकेला उपस्थित राहणे बंधनकारक असून, तासिकानिहाय स्वाक्षरीपत्रकाद्वारे उपस्थिती नोंदविण्यात येणार आहे. ही उपस्थिती प्रशिक्षण पोर्टलवर विहित वेळेत अपलोड केली जाणार आहे.
२) प्रशिक्षणार्थींना उपलब्ध नसलेल्या सुविधा : सदर प्रशिक्षण अनिवासी स्वरूपाचे असल्याने प्रशिक्षणार्थींना चहा, अल्पोपहार, भोजन आणि प्रवासभत्ता यांसारख्या कोणत्याही सुविधा उपलब्ध करून दिल्या जाणार नाहीत.
३) पूर्वचाचणी व उत्तरचाचणी : प्रशिक्षणादरम्यान पूर्वचाचणी आणि उत्तरचाचणी मोबाईलद्वारे सोडविण्याचे नियोजन करण्यात आले आहे. त्यासाठी स्मार्टफोन आणि सक्षम इंटरनेट सुविधा आवश्यक असल्याचे सूचित करण्यात आले आहे.
४) प्रशिक्षणासाठी आवश्यक साहित्य : स्वाध्याय लेखनासाठी फुलस्केप कागद किंवा प्रोजेक्ट पेपर आणि वही सोबत ठेवण्याच्या सूचना देण्यात आल्या आहेत. तसेच अध्यापन विषयाची किमान पाठ्यपुस्तके आणि प्रश्नपत्रिका आवश्यक साहित्यामध्ये समाविष्ट आहेत.
५) अभ्यासासाठी संदर्भ साहित्य : प्रशिक्षणापूर्वी राष्ट्रीय शिक्षण धोरण २०२०, राज्य अभ्यासक्रम आराखडा २०२४ तसेच शाळा मूल्यांकन (SQAAF) आणि आश्वासन आराखडा या परिषदेच्या संकेतस्थळावरील साहित्याचे अवलोकन करण्याबाबत सूचना देण्यात आल्या आहेत.
६) प्रशिक्षणाच्या शेवटी लेखी चाचणी : प्रशिक्षणाच्या समाप्तीनंतर परीक्षा पद्धतीनुसार लेखी चाचणीचे आयोजन करण्यात येणार आहे.
७) स्वाध्याय आणि प्रकल्प अहवालाचे नियोजन : प्रशिक्षणार्थींना एकूण दहा स्वाध्याय पूर्ण करावे लागणार आहेत. त्यापैकी पाच स्वाध्याय प्रशिक्षण कालावधीत वैयक्तिक तंत्रज्ञानाचा वापर करून निर्धारित वेळेत पूर्ण करायचे आहेत. उर्वरित पाच स्वाध्याय तसेच प्रकल्प, कृतीसंशोधन किंवा नवोपक्रम अहवाल प्रशिक्षण पूर्ण झाल्यानंतर ४० दिवसांच्या आत वैयक्तिकरीत्या पूर्ण करणे आवश्यक आहे.
८) स्वाध्याय व अहवाल जमा करण्याची प्रक्रिया : पूर्ण केलेले स्वाध्याय आणि प्रकल्पाशी संबंधित अहवाल प्रशिक्षण केंद्र समन्वयक यांच्या सूचनेनुसार मार्गदर्शकांकडे विहित मुदतीत जमा करावे लागतील. सर्व प्रशिक्षणार्थींचे स्वाध्याय आणि अहवाल प्राप्त झाल्यानंतर सुलभकांना दोन दिवसांसाठी निमंत्रित करून तपासणी, मूल्यांकन आणि गुणांची नोंद करण्याची कार्यवाही केली जाणार आहे.
९) कला व क्रीडा शिक्षकांचे स्वतंत्र वेळापत्रक : कला व क्रीडा शिक्षकांचे पहिले सात दिवसांचे प्रशिक्षण १३ ते १९ नोव्हेंबर २०२६ या कालावधीत नियमित प्रशिक्षण वर्गासोबत होईल. त्यानंतर २० ते २२ नोव्हेंबर २०२६ या तीन दिवसांचे प्रशिक्षण विभागस्तरावर आयोजित करण्यात येणार आहे.
वरील सूचनांनुसार वरिष्ठ व निवड वेतनश्रेणी प्रशिक्षणामध्ये उपस्थिती, चाचण्या, स्वाध्याय आणि प्रकल्प अहवाल यांना महत्त्व देण्यात आले आहे. प्रशिक्षणार्थी शिक्षकांसाठी प्रशिक्षणापूर्वी, प्रशिक्षणादरम्यान आणि प्रशिक्षण पूर्ण झाल्यानंतर करावयाच्या कार्यवाहीचे स्वरूप प्रशासनाने स्पष्ट केले आहे.
- अधिक माहितीसाठी : वरिष्ठ व निवड वेतनश्रेणी प्रशिक्षण सूचना बाबतचे दिनांक २९ ऑक्टोबर २०२६ रोजीचे परिपत्रक डाउनलोड करा
- अधिकृत वेबसाईट : https://www.maa.ac.in/
Related
वरिष्ठ वेतनश्रेणी व निवड वेतनश्रेणी प्रशिक्षण वेळापत्रक
